അമേരിക്കയിൽ മാരക ഫംഗസായ കാൻഡിഡ ഔറിസ്

വാഷിങ്ടൺ: അമേരിക്കയിൽ മാരക ഫംഗസായ കാൻഡിഡ ഔറിസ് (candida auris) പടരുന്നു. 27 യുഎസ് സംസ്ഥാനങ്ങളിലായി കുറഞ്ഞത് 7,000 പേരെ ഫംഗസ് ബാധിച്ചതായി സെന്റേഴ്സ് ഫോർ ഡിസീസ് കൺട്രോൾ ആൻഡ് പ്രിവൻഷൻ ( സിഡിസി ) വ്യക്തമാക്കി. പ്രതിരോധ ശേഷിയുള്ളതും മാരകവുമായ ഫംഗസിനെ പ്രതിരോധിക്കാൻ ആശുപത്രികളും നഴ്സിങ് ഹോമുകളും മറ്റ് മെഡിക്കൽ സൗകര്യങ്ങളും പാടുപെടുന്നതായി സിഡിസിയെ ഉദ്ധരിച്ച് വിവിധ മാധ്യമങ്ങൾ റിപ്പോർട്ട് ചെയ്തു.

അമേരിക്കയിലെ 27 സംസ്ഥാനങ്ങളിൽ ഇതിനോടകം രോഗം സ്ഥിരീകരിച്ചിട്ടുണ്ട്. 2025ൽ മാത്രം ഏകദേശം 7,000 ൽ അധികം കാൻഡിഡ ഓറിസ് രോഗബാധ റിപ്പോർട്ട് ചെയ്തു. കഴിഞ്ഞ വർഷത്തെ റെക്കോഡ് സംഖ്യയായ 7,500 ൽ അധികം കേസുകൾ ഉടൻ തന്നെ മറികടക്കുമെന്നാണ് വിദഗ്ദ്ധർ പറഞ്ഞു.

2016ൽ യുഎസിൽ ആദ്യമായി റിപ്പോർട്ട് ചെയ്യപ്പെട്ട കാൻഡിഡ ഓറിസ് ദുർബലമായ രോഗപ്രതിരോധ ശേഷിയുള്ള ആളുകളിൽ മാരകമായ അണുബാധകൾക്ക് കാരണമാകും. രക്തം, മുറിവുകൾ, ചെവികൾ എന്നിങ്ങനെ ശരീരത്തിന്റെ വിവിധ ഭാഗങ്ങളിൽ കാൻഡിഡ ഓറിസ് അണുബാധയ്ക്ക് കാരണമാകും. ലക്ഷണങ്ങൾ അണുബാധയുടെ സ്ഥാനത്തെയും തീവ്രതയെയും ആശ്രയിച്ചിരിക്കുന്നുവെങ്കിലും പനി അല്ലെങ്കിൽ വിറയൽ പോലുള്ള ബാക്ടീരിയകൾ മൂലമുണ്ടാകുന്ന അണുബാധകളുടെ ലക്ഷണങ്ങളുമായി അവ സമാനമായിരിക്കാം. കാൻഡിഡ ഓറിസ് അണുബാധകൾക്ക് പ്രത്യേകമായ ഒരു സാധാരണ ലക്ഷണമില്ല.

സിഡിസിയുടെ കണക്കനുസരിച്ച് കാൻഡിഡ ഓറിസ് രോഗബാധയുള്ളവരിൽ 30 മുതൽ 60 ശതമാനം വരെ മരണമടയുന്നുണ്ട്. എന്നാൽ ഈ രോഗികളിൽ പലരും ഇതിനോടകം ഗുരുതരമായ ആരോഗ്യ പ്രശ്നങ്ങളുള്ളവരായിരുന്നു എന്നും മരണനിരക്ക് കൂടാൻ ഇത് കാരണമായി എന്നും സിഡിസി സൂചിപ്പിക്കുന്നു.

എന്താണ് കാൻഡിഡ ഔറിസ്?

സിഡിസി പറയുന്നതനുസരിച്ച് കാൻഡിഡ ഔറിസ് ഒരുതരം യീസ്റ്റ് ആണ്. ഇത് ഗുരുതരമായ രോഗങ്ങൾ ഉണ്ടാക്കാനും ആശുപത്രികളിൽ ചികിത്സയിലുള്ള രോഗികൾക്കിടയിൽ എളുപ്പത്തിൽ പടരാനും സാധ്യതയുണ്ട്. കാൻഡിഡ ഔറിസ് ചർമ്മത്തിലെ അണുബാധ മുതൽ രക്തത്തിലെ അണുബാധ പോലുള്ള ജീവന് അപകടമുണ്ടാക്കുന്ന ഗുരുതരമായ അണുബാധകൾ വരെ ഉണ്ടാക്കാം.

എന്തുകൊണ്ട് ഈ ഫംഗസ് ഇത്ര അപകടകാരിയാണ്?

കാൻഡിഡ ഔറിസ് പലപ്പോഴും ഫംഗസ് വിരുദ്ധ മരുന്നുകളെ പ്രതിരോധിക്കുന്നു. അതായത്, മരുന്നുകളെ ചെറുത്ത് തോൽപ്പിക്കാനുള്ള കഴിവ് ഈ ഫംഗസിനുണ്ട്. ഇത് കാരണം അണുക്കൾ നശിക്കാതെ വളർന്നുകൊണ്ടേയിരിക്കും. ഇത്തരം പ്രതിരോധശേഷിയുള്ള അണുബാധകൾ ചികിത്സിക്കാൻ ബുദ്ധിമുട്ടാണ്. ചിലപ്പോൾ അസാധ്യവുമാണ്.

കാൻഡിഡ ഔറിസിന്റെ ലക്ഷണങ്ങൾ എന്തൊക്കെയാണ്?

കാൻഡിഡ ഔറിസ് ശരീരത്തിന്റെ വിവിധ ഭാഗങ്ങളിൽ അണുബാധ ഉണ്ടാക്കാം. രക്തം, മുറിവുകൾ, ചെവി എന്നിവിടങ്ങളിൽ ഇത് ബാധിക്കാം. കാൻഡിഡ ഔറിസ് അണുബാധയുടെ ലക്ഷണങ്ങൾ അണുബാധയുടെ സ്ഥാനത്തെയും തീവ്രതയെയും ആശ്രയിച്ചിരിക്കും. പനി അല്ലെങ്കിൽ വിറയൽ പോലുള്ള ബാക്ടീരിയ അണുബാധയുടെ ലക്ഷണങ്ങളുമായി ഇതിന് സാമ്യമുണ്ടാകാം. കാൻഡിഡ ഔറിസ് അണുബാധയ്ക്ക് ഒരു പ്രത്യേക പൊതുവായ ലക്ഷണങ്ങളില്ല.