യു എ ഇ വാർത്ത

ദുബായ്: പുതുവർഷത്തെ വരവേൽക്കാൻ ദുബായിലെ തൊഴിലാളികൾക്കായി മെഗാ ന്യൂ ഇയർ ആഘോഷ പരിപാടികൾ ഒരുങ്ങുന്നു. ദുബായ് ജനറൽ ഡയറക്ടറേറ്റ് ഓഫ് ഐഡന്റിറ്റി ആൻഡ് ഫോറിനേഴ്സ് അഫയേഴ്സ് ( ജിഡിആർഎഫ്എ ദുബായ് ), ദുബായ് പെർമനന്റ് കമ്മിറ്റി ഫോർ ലേബർ അഫയേഴ്സുമായി സഹകരിച്ചാണ് പരിപാടി സംഘടിപ്പിക്കുന്നത്.തുടർച്ചയായ മൂന്നാം വർഷമാണ് തൊഴിലാളി സമൂഹത്തിന് സമർപ്പിച്ചുള്ള ഈ നവവത്സരാഘോഷം നടക്കുന്നത്. പ്രധാന വേദി അൽ ഖൂസായിരിക്കും. നേരിട്ടുള്ള പങ്കാളിത്തവും വിർച്വൽ പങ്കാളിത്തവും ഉൾക്കൊള്ളുന്ന ഹൈബ്രിഡ് ഫോർമാറ്റിലാണ് പരിപാടി ഒരുക്കിയിരിക്കുന്നത്. അൽ ഖൂസിനൊപ്പം ജെബൽ അലി, മുഹൈസ്‌ന തുടങ്ങിയ നിശ്ചിത തൊഴിലാളി കേന്ദ്രങ്ങളിലും ഓൺ-ഗ്രൗണ്ട് ആഘോഷങ്ങൾ നടക്കും.

2025 ഡിസംബർ 31 വൈകുന്നേരം 6 മണിക്ക് ആരംഭിക്കുന്ന പരിപാടികൾ അർധരാത്രിവരെ തുടരും. അതോടൊപ്പം ‘ബ്ലൂ കണക്ട്’ (Blue Connect) ആപ്ലിക്കേഷൻ വഴിയും തൊഴിലാളികൾക്ക് ലൈവ് സ്ട്രീമിങ്ങിലൂടെയും ഡിജിറ്റൽ ഇടപെടലുകളിലൂടെയും ആഘോഷത്തിൽ പങ്കാളികളാകാൻ സൗകര്യമുണ്ട്. സൗജന്യ രജിസ്ട്രേഷനിലൂടെ എല്ലാ ഇവന്റുകളിലും നറുക്കെടുപ്പുകളിലും പങ്കെടുക്കാം.

5 ലക്ഷം ദിർഹത്തിലധികം സമ്മാനങ്ങൾ

ആഘോഷത്തിന്റെ പ്രധാന ആകർഷണങ്ങളിൽ ഒന്ന് 5 ലക്ഷം ദിർഹത്തിലധികം മൂല്യമുള്ള വമ്പൻ സമ്മാനങ്ങൾ നറുക്കെടുപ്പിലൂടെ നൽകുന്നു എന്നതാണ്. കാറുകൾ, സ്വർണ നാണയങ്ങളും സ്വർണ ബാറുകളും, മൊബൈൽ ഫോണുകൾ, യാത്രാ ടിക്കറ്റുകൾ എന്നിവ ഉൾപ്പെടെയുള്ള നിരവധി ആകർഷക സമ്മാനങ്ങളാണ് വിജയികളെ കാത്തിരിക്കുന്നത്. ഓൺ - ഗ്രൗണ്ടും വിർച്വലുമായ പങ്കാളിത്തത്തിലൂടെയും തൊഴിലാളികൾക്ക് ഈ നറുക്കെടുപ്പുകളിൽ ഭാഗമാകാം.

സിനിമ – സംഗീത ലോകത്തെ പ്രമുഖർ അണിനിരക്കുന്ന സ്റ്റേജ് ഷോകളും ആഘോഷത്തിന് കൂടുതൽ തിളക്കം നൽകും. ബോളിവുഡ് നടിമാരായ സരീൻ ഖാൻ, പൂനം പാണ്ഡേ, അനേരി വാജാനി, ടാന്യ ദേശായി എന്നിവരും പ്രശസ്ത ഗായകരായ സ്നേഹ ഉപാധ്യായ, അങ്കുഷ് ഭർദ്വാജ് എന്നിവരും വേദിയിലെത്തും. ഡിജെ തസ്യ സ്റ്റെപാനോവയുടെ ഡിജെ പെർഫോമൻസും അന്താരാഷ്ട്ര നൃത്തസംഘങ്ങളുടെ ആവേശകരമായ പ്രകടനങ്ങളും വിവിധ രാജ്യങ്ങളുടെ നാടൻകലകളുടെ അവതരണങ്ങളും പുതുവത്സര രാത്രിയെ ഉത്സവാന്തരീക്ഷത്തിലാക്കും.

ഈ ആഘോഷം യുഎഇയുടെ മാനുഷിക സമീപനത്തിന്റെ ശക്തമായ പ്രതിഫലനമാണെന്നും തൊഴിലാളികൾ ദുബായുടെ വികസനത്തിന്റെ അടിത്തറയും ഭാവി നിർമ്മാണത്തിലെ യഥാർത്ഥ പങ്കാളികളുമാണെന്നും ജിഡിആർഎഫ്എ ദുബായ് ഡയറക്ടർ ജനറൽ ലെഫ്റ്റനന്റ് ജനറൽ മുഹമ്മദ് അഹമ്മദ് അൽ മറി പറഞ്ഞു. സാമൂഹിക ഐക്യവും ‘കമ്മ്യൂണിറ്റി വർഷം’ എന്ന ആശയത്തിന്റെ മൂല്യങ്ങളും ജീവസുറതാക്കുകയാണ് ഈ പരിപാടിയുടെ ലക്ഷ്യമെന്ന് ജിഡിആർഎഫ്എ ഡെപ്യൂട്ടി ഡയറക്ടർ ജനറലും പെർമനന്റ് കമ്മിറ്റി ഫോർ ലേബർ അഫയേഴ്സ് ചെയർമാനുമായ മേജർ ജനറൽ ഒബൈദ് മുഹൈർ ബിൻ സുറൂർ വ്യക്തമാക്കി.

നേരിട്ടോ ‘ബ്ലൂ കണക്ട്’ വഴി വിർച്വലായോ ഈ അപൂർവ പുതുവത്സരാഘോഷത്തിൽ പങ്കുചേരാൻ ദുബായിലെ മുഴുവൻ തൊഴിലാളികളെയും ജിഡിആർഎഫ്എ ദുബായ് ക്ഷണിച്ചു. “മനുഷ്യരാണ് വികസനത്തിന്റെ ഹൃദയം” എന്ന ദുബായുടെ ദർശനം ശക്തമായി ഉയർത്തിപ്പിടിക്കുന്ന ഈ ആഘോഷം, പുതുവത്സരത്തെ സന്തോഷത്തോടെയും ഐക്യത്തോടെയും വരവേൽക്കുന്ന ഒരു കൂട്ടായ അനുഭവമാകുമെന്ന് അധികൃതർ വ്യക്തമാക്കി.