യുഎസിൻ്റെ യാത്രാ നിരോധനം

വാഷിങ്ടൺ: അമേരിക്കയിലെ ഇന്ത്യക്കാരടക്കമുള്ള കുടിയേറ്റക്കാർ ശ്രദ്ധിക്കേണ്ട ചില മാറ്റങ്ങൾ 2026 ജനുവരി ഒന്നുമുതൽ പ്രാബല്യത്തിൽ വന്നിരിക്കുകയാണ്. യുഎസ് ഭരണകൂടം വിവിധ രാജ്യങ്ങളിൽ നിന്നുള്ളവർക്ക് യാത്രാ നിരോധനം ഏർപ്പെടുത്തിയത് നിലവിൽ വന്നതാണ് ആദ്യത്തേത്. മറ്റൊന്ന്, മുൻപ് വർധിപ്പിച്ചിരുന്ന കുടിയേറ്റ അനുബന്ധ ഫീസുകൾ പ്രാബല്യത്തിൽ വന്നതുമാണ്. ഇവ രണ്ടും വിശദമായി അറിയാം.

39 രാജ്യങ്ങളിൽനിന്ന് ഉള്ളവർക്ക് യാത്രാ നിരോധനം

യുഎസ് ഭരണകൂടം കൂടുതൽ രാജ്യങ്ങളിൽ നിന്നുള്ള പൗരന്മാർക്ക് യാത്രാ നിരോധനം ഏർപ്പെടുത്തിയ നടപടി ജനുവരി ഒന്നുമുതൽ പ്രാബല്യത്തിൽ വന്നു. 39 രാജ്യങ്ങളിൽ നിന്നുള്ള പൗരന്മാർക്കാണ് യുഎസിലേക്ക് പൂർണമോ ഭാഗികമായോ യാത്രാ വിലക്ക് ഏർപ്പെടുത്തിയിരിക്കുന്നത്. ഡിസംബ‍ർ പകുതിയോടെയോടെയാണ് ഇതുസംബന്ധിച്ച പ്രഖ്യാപനം ഭരണകൂടം നടത്തിയത്.

അഫ്ഗാനിസ്ഥാൻ, ബർമ, ചാഡ്, റിപ്പബ്ലിക് ഓഫ് കോംഗോ, ഇക്വറ്റോറിയൽ ഗിനിയ, എറിത്രിയ, ഹെയ്തി, ഇറാൻ, ലിബിയ, സൊമാലിയ, സുഡാൻ, യെമൻ, ബുർക്കിന ഫാസോ, ലാവോസ്, മാലി, നൈജർ, സിയറ ലിയോൺ, ദക്ഷിണ സുഡാൻ, സിറിയ എന്നിവിടങ്ങളിൽ നിന്നുള്ളവർക്കും പലസ്തീൻ അതോറിറ്റി നൽകിയ യാത്രാ രേഖകൾ കൈവശം വെച്ചിരിക്കുന്ന വ്യക്തികൾക്കും ആണ് പൂർണ യാത്രാ നിരോധനം ഏ‍ർപ്പെടുത്തിയിരിക്കുന്നത്. ഇന്നുമുതൽ ഈ രാജ്യങ്ങളിൽ നിന്നുള്ളവർക്ക് യുഎസ് വിസ ലഭിക്കില്ല.

അംഗോള, ആന്റിഗ്വ, ബാർബുഡ, ബെനിൻ, ബുറുണ്ടി, കോട്ട് ഡി ഐവയർ, ക്യൂബ, ഡൊമിനിക്ക, ഗാബൺ, ഗാംബിയ, മലാവി, മൗറിറ്റാനിയ, നൈജീരിയ, സെനഗൽ, ടാൻസാനിയ, ടോഗോ, ടോംഗ, വെനിസ്വേല, സാംബിയ, സിംബാബ്‌വെ എന്നീ രാജ്യങ്ങൾക്ക് ഭാഗിക യാത്രാ വിലക്കും ഏ‍ർപ്പെടുത്തിയിട്ടുണ്ട്.

അതേസമയം ഇന്ത്യ അടക്കമുള്ള മറ്റ് രാജ്യങ്ങളിൽ നിന്നുള്ളവ‍ർക്ക് യാത്രാ നിരോധനം ബാധകമാകില്ല. കൂടാതെ, സാധുവായ വിസയോടെ യുഎസിൽ താമസിക്കുന്ന മേൽപറഞ്ഞ 39 രാജ്യങ്ങളിൽ നിന്നുള്ളവർക്കും നിയന്ത്രണങ്ങൾ ബാധകമാകില്ല. കൂടാതെ, അത്‍‍ലെറ്റുകൾ, ചില നയതന്ത്ര ഉദ്യോഗസ്ഥർ, ഇരട്ട പൗരത്വമുള്ളവർ ഉള്ളവ‍ർ എന്നിവർക്കും ബാധകമല്ല. അതേസമയം യുഎസ് ഭരണകൂടത്തിൻ്റെ നടപടിക്ക് പ്രതികരണമായി യുഎസ് പൗരന്മാർക്ക് ആഫ്രിക്കൻ രാജ്യങ്ങൾ യാത്രാ വിലക്ക് ഏ‍ർപ്പെടുത്തി. മാലി, ബു‍ർക്കിന ഫാസോ, നൈഗർ എന്നീ രാജ്യങ്ങളാണ് യുഎസ് പൗരന്മാർക്ക് പ്രവേശനാനുമതി തടഞ്ഞത്.

കുടിയേറ്റ അനുബന്ധ ഫീസുകൾ വർധിച്ചു

വാ‍ർഷിക അഭയാർഥി അപേക്ഷ (annual asylum application) ഫീസ് 100 ഡോളറിൽനിന്ന് 102 ഡോളറായി വർധിപ്പിച്ചു.

ആദ്യമായി എംപ്ലോയ്മെൻ്റ് ഓതറൈസേഷൻ ഡോക്യുമെൻ്റിന് അപേക്ഷിക്കുന്ന അഭയാർഥി അപേക്ഷകനുള്ള ഫീസ് (ഫോം I-765) 550 ഡോളറിൽനിന്ന് 560 ഡോളറായി വർധിപ്പിച്ചു.

പരോൾ സ്റ്റാറ്റസിന്റെ അടിസ്ഥാനത്തിൽ ആദ്യമായി എംപ്ലോയ്മെൻ്റ് ഓതറൈസേഷൻ ഡോക്യുമെൻ്റിന് അപേക്ഷിക്കുന്ന വ്യക്തിക്കുള്ള ഫീസ് (ഫോം I-765) 275 ഡോളറിൽനിന്ന് 280 ഡോളറായി വർധിപ്പിച്ചു.

ഒരു വ്യക്തി ആദ്യമായി ടെംപററി പ്രൊട്ടക്ടഡ് സ്റ്റാറ്റസ് അധിഷ്ഠിത എംപ്ലോയ്മെൻ്റ് ഓതറൈസേഷൻ ഡോക്യുമെൻ്റിന് അപേക്ഷിക്കുമ്പോഴുള്ള ഫീസ് (I-765) 550 ഡോളറിൽനിന്ന് 560 ഡോളറായി വർധിപ്പിച്ചു.

ടെംപററി പ്രൊട്ടക്ടഡ് സ്റ്റാറ്റസ് പ്രകാരം ഒരു വ്യക്തി എംപ്ലോയ്മെൻ്റ് ഓതറൈസേഷൻ ഡോക്യുമെൻ്റ് പുതുക്കുന്നതിനോ നീട്ടുന്നതിനോ ഉള്ള ഫീസ് (ഫോം I-765) 275 ഡോളറിൽനിന്ന് 280 ഡോളറായി വർധിപ്പിച്ചു.

പുതിയ പരോൾ കാലയളവ് (റീ-പരോൾ) അനുവദിച്ചിട്ടുള്ള വ്യക്തി എംപ്ലോയ്മെൻ്റ് ഓതറൈസേഷൻ ഡോക്യുമെൻ്റിന് അപേക്ഷിക്കുമ്പോഴുള്ള ഫീസ് (ഫോം I-131) 275 ഡോളറിൽനിന്ന് 280 ഡോളറായി വർധിപ്പിച്ചു.

ടെംപററി പ്രൊട്ടക്ടഡ് സ്റ്റാറ്റസിനുള്ള അപേക്ഷാ ഫീസ് (ഫോം I-821) 500 ഡോളറിൽനിന്ന് 510 ഡോളറായി വർധിപ്പിച്ചു.

അഭയാർഥി അപേക്ഷയ്ക്കുള്ള പ്രാഥമിക ഫീസായ (ഫോം I-589) 100 ഡോളറും അഭയാർഥി അപേക്ഷകൻ്റെ എംപ്ലോയ്മെൻ്റ് ഓതറൈസേഷൻ ഡോക്യുമെൻ്റിൻ്റെ കാലാവധി നീട്ടാനുള്ള ഫീസായ (ഫോം I-765) 275 ഡോളറും സ്പെഷ്യൽ ഇമിഗ്രൻ്റ് ജുവനൈൽ ഫീസായ (ഫോം I-360) 250 ഡോളറും മാറ്റമില്ലാതെ തുടരും.