ക്രിക്കറ്റ്‌

ഇന്ത്യ-ശ്രീലങ്ക എസിസി അണ്ടര്‍-19 ഏഷ്യാ കപ്പ് സെമിഫൈനല്‍ മത്സരം ഇന്ന് (ഡിസംബര്‍ 19 വെള്ളി) അരങ്ങേറും. ദുബായ് ഐസിസി അക്കാദമിയില്‍ ഇന്ത്യന്‍ സമയം രാവിലെ 10.30 ന് മല്‍സരം ആരംഭിക്കും. തോല്‍വിയറിയാതെയാണ് ഇന്ത്യന്‍ ആദ്യ ഘട്ടം പൂര്‍ത്തിയാക്കിയത്. മൂന്ന് മത്സരങ്ങളും വിജയിച്ച് ഗ്രൂപ്പ് എയില്‍ ഒന്നാമതെത്തി. വൈഭവ് സൂര്യവംശി , ആയുഷ് മാഹ്‌ത്രെ, അഭിഗ്യാന്‍ കുന്‍ഡു തുടങ്ങിയ ബാറ്റര്‍മാരുടെ ഉജ്വല ഫോമിലാണ് ഇന്ത്യയുടെ പ്രതീക്ഷ.

സൂര്യവംശി മൂന്ന് മാച്ചുകളില്‍ ഒരു സെഞ്ചുറിയും അര്‍ധസെഞ്ചുറിയും ഉള്‍പ്പെടെ ടൂര്‍ണമെന്റില്‍ ഇതിനകം 226 റണ്‍സ് നേടി. യുഎഇക്കെതിരേ ആദ്യ മല്‍സരത്തില്‍ 95 പന്തില്‍ 171 റണ്‍സ് നേടി സൂര്യവംശി റെക്കോഡുകള്‍ തകര്‍ത്തിരുന്നു. ഈ മാച്ചില്‍ ഇന്ത്യ 234 റണ്‍സിന് ജയിച്ചു.

പാകിസ്താനെതിരായ രണ്ടാം മല്‍സരത്തില്‍ മലയാളി താരം ആരോണ്‍ ജോര്‍ജ് 85 (88) ആണ് ബാറ്റിങില്‍ തിളങ്ങിയത്. ഓള്‍റൗണ്ട് മികവിലൂടെ കനിഷ്‌ക് ചൗഹാന്‍ പ്ലെയര്‍ ഓഫ് ദി മാച്ച് ആയപ്പോള്‍ ഇന്ത്യ 90 റണ്‍സ് ജയം നേടി.

മലേഷ്യക്കെതിരേ അഭിഗ്യാന്‍ കുന്‍ഡു ഇരട്ട സെഞ്ചുറി 209 (125) നേടി. സൂര്യവംശി 50 (26) റണ്‍സെടുത്തു. 315 റണ്‍സിന്റെ കൂറ്റന്‍ വിജയമാണ് ഇന്ത്യ നേടിയത്.ഗ്രൂപ്പ് ബിയില്‍ രണ്ടാം സ്ഥാനത്തെത്തിയാണ് ശ്രീലങ്ക സെമിയിലേക്ക് കടന്നത്. മൂന്ന് മത്സരങ്ങളില്‍ രണ്ടെണ്ണത്തില്‍ വിജയിച്ചപ്പോള്‍ ബംഗ്ലാദേശിനെതിരെ തോല്‍വിയറിഞ്ഞു.

മത്സരം ഇന്ത്യയില്‍ സോണി സ്‌പോര്‍ട്‌സ് നെറ്റ്വര്‍ക്കില്‍ സംപ്രേഷണം ചെയ്യും. തത്സമയ സ്ട്രീമിങ് സോണി ലിവ് ആപ്പിലും വെബ്സൈറ്റിലും ലഭ്യമാകും.

ടീമുകള്‍

ഇന്ത്യ: ആയുഷ് മാത്രെ (ക്യാപ്റ്റന്‍), വൈഭവ് സൂര്യവംശി, വിഹാന്‍ മല്‍ഹോത്ര (വൈസ് ക്യാപ്റ്റന്‍), അഭിഗ്യാന്‍ കുന്‍ഡു (വിക്കറ്റ് കീപ്പര്‍), ഹര്‍വന്‍ഷ് സിങ് (വിക്കറ്റ് കീപ്പര്‍), വേദാന്ത് ത്രിവേദി, യുവരാജ് ഗോഹില്‍, കനിഷ്‌ക് ചൗഹാന്‍, ഖിലന്‍ പട്ടേല്‍, നമന്‍ പുഷ്പക്, ഡി ദീപേഷ്, ഹെനില്‍ പട്ടേല്‍, കിഷന്‍ കുമാര്‍ സിങ്, ഉദ്ധവ് മോഹന്‍, ആരോണ്‍ ജോര്‍ജ്.

ശ്രീലങ്ക: ദിമന്ത മഹാവിതാന, വിരണ്‍ ചമുദിത, കിത്മ വിതാനപതിരണ, കവിജ ഗമഗെ, വിമത് ദിന്‍സാര (ക്യാപ്റ്റന്‍), ചാമിക ഹീനതിഗാല, ആദം ഹില്‍മി (വിക്കറ്റ് കീപ്പര്‍), ദുല്‍നിത് സിഗേര, സേത്മിക സെനവിരത്നെ, രസിത് നിംശര, വിഘ്നേശ്വരന്‍ ആകാശ്, മാതുലന്‍ കുഗതാസ്, തരുഷ നവോദ്യ, തരുഷ നെതസാര, സനുജ നിന്ദുവാര.