IND vs NZ

ഇന്ത്യ- ന്യൂസീലൻഡ് ഏകദിന, ടി20 പരമ്പരകൾ വരാൻ പോവുകയാണ്. ഇതിന് പിന്നാലെ ടി20 ലോകകപ്പിന്റെ ആവേശത്തിലേക്ക് ക്രിക്കറ്റ് ലോകം കടക്കും. ഇത്തവണത്തെ ടി20 ലോകകപ്പിന് ഇന്ത്യയും ശ്രീലങ്കയുമാണ് വേദിയാകുന്നത്. ആതിഥേയരെന്ന നിലയിൽ ഇന്ത്യയാണ് ടൂർണമെന്റിലെ ഫേവറേറ്റുകൾ. ശക്തമായ ടീം കരുത്തും ഇന്ത്യക്ക് അവകാശപ്പെടാൻ സാധിക്കും. അതുകൊണ്ടുതന്നെ ഇത്തവണ ഇന്ത്യ കപ്പിലേക്കെത്താനുള്ള സാധ്യതകളും കൂടുതലാണ്.

ഇനി ടി20 ലോകകപ്പിന് മുമ്പ് ന്യൂസീലൻഡിനെതിരായ അഞ്ച് മത്സര ടി20 പരമ്പര കളിച്ച് പൂർണ്ണ ആത്മവിശ്വാസത്തോടെ ടൂർണമെന്റിന് ഇറങ്ങാനാവും ഇന്ത്യ ശ്രമിക്കുക. ഇപ്പോഴിതാ ഐസിസി ടൂർണമെന്റുകൾക്ക് മുമ്പ് ഇന്ത്യക്ക് പ്രത്യേക പരിഗണന ലഭിക്കുകയാണെന്ന് അഭിപ്രായപ്പെട്ടിരിക്കുകയാണ് ന്യൂസീലൻഡ് പേസ് ഓൾറൗണ്ടറായ ജെയിംസ് നിഷാം.

ഇന്ത്യക്ക് അനുകൂലമായാണ് ഇപ്പോൾ സാഹചര്യങ്ങൾ ഒരുക്കി നൽകുന്നതെന്നാണ് നിഷാം പറയുന്നത്. സമീപകാലത്തെ ഐസിസി ട്രോഫികളിൽ കൂടുതലും ഏഷ്യൻ സാഹചര്യത്തിലാണ്. കൂടാതെ ആതിഥേയരാവുമ്പോൾ ഐസിസി ടൂർണമെന്റിന് മുമ്പ് മികച്ച ഹോം മത്സരങ്ങളും ഇന്ത്യക്ക് നൽകുന്നു. ഇത് ടീമിന് ഗുണം ചെയ്യുന്നുണ്ടെന്നാണ് നിഷാം ചൂണ്ടിക്കാട്ടുന്നത്.

ഇത്തവണത്തെ ടി20 ലോകകപ്പിന് ആതിഥേയർ ഇന്ത്യയാണ്. ഇതിന് മുന്നോടിയായി ഇന്ത്യ പ്രധാന ടീമുകൾക്കെതിരേ ടി20 പരമ്പര കളിച്ച് കഴിഞ്ഞു. ഓസ്ട്രേലിയക്കെതിരേ ഓസ്ട്രേലിയയിൽ ടി20 പരമ്പര കളിച്ച് ഇന്ത്യ പരമ്പര നേടി. അവസാന ടി20 ലോകകപ്പിലെ ജേതാക്കളായ ഇന്ത്യ ഫെെനലിൽ സൗത്താഫ്രിക്കയെയാണ് തോൽപ്പിച്ചത്. ഇത്തവണയും സൗത്താഫ്രിക്ക വെല്ലുവിളിയാകുമെന്ന് കരുതി ഇന്ത്യ അവർക്കെതിരേ പരമ്പര കളിച്ചു.

ഇപ്പോൾ ന്യൂസീലൻഡിനെതിരേ ടി20 പരമ്പരയും കളിക്കാൻ പോകുന്നു. ആതിഥേയരായ ഇന്ത്യ ടി20 ലോകകപ്പിന് മുമ്പ് കൂടുതൽ ഹോം മത്സരങ്ങൾ കളിച്ച് മുൻതൂക്കം ഊട്ടിയുറപ്പിക്കുകയാണെന്നാണ് നിഷാം ആരോപിക്കുന്നത്. ഇന്ത്യക്കെതിരായ ടി20 പരമ്പരയെക്കുറിച്ചും നിഷാം പറഞ്ഞു. ഇന്ത്യയെപ്പോലൊരു ശക്തമായ ടീം തട്ടകത്തിൽ വലിയ മുൻ‌തൂക്കം അവകാശപ്പെടാൻ സാധിക്കുന്നവരാണ്.

എന്നാൽ തങ്ങൾക്ക് കൃത്യമായ പദ്ധതികളുണ്ടെന്നാണ് നിഷാം പറയുന്നത്. വളരെ കൃത്യമായ പദ്ധതികളോടെയാണ് ഇന്ത്യൻ പരമ്പരക്ക് ഇറങ്ങുന്നത്. എന്നാൽ ടൂർണമെന്റിന് മുമ്പ് ഇതിനെക്കുറിച്ച് പറയാൻ ആഗ്രഹിക്കുന്നില്ല. കഴിഞ്ഞ കുറച്ച് വർഷങ്ങളായി ഇന്ത്യൻ സാഹചര്യത്തിൽ മികച്ച പ്രകടനങ്ങൾ നടത്താൻ ഞങ്ങൾക്കായിട്ടുണ്ട്. ഇന്ത്യയെപ്പോലൊരു ടീമിനെ അവരുടെ തട്ടകത്തിൽ തോൽപ്പിക്കുക എളുപ്പമുള്ള ജോലിയല്ലെന്നും എന്നാൽ ഇപ്പോൾ ടി20 ലോകകപ്പിന്റെ സമ്മർദ്ദമില്ലാതെ ഈ പരമ്പരയിലേക്ക് മാത്രമാണ് ഉറ്റു നോക്കുന്നതെന്നുമാണ് നിഷാം പറയുന്നത്.

എല്ലാവർക്കും അവരുടേതായ റോളുണ്ട്. അതിനനുസരിച്ച് ഏറ്റവും മികച്ച പ്രകടനം പുറത്തെടുക്കാനാണ് ശ്രമിക്കുന്നത് എന്നാണ് നിഷാം ഹിന്ദുസ്ഥാൻ ടെെംസിനോട് സംസാരിച്ചപ്പോൾ പറഞ്ഞത്. ന്യൂസീലൻഡ് കരുത്തരുടെ നിരയാണ്. അതുകൊണ്ടുതന്നെ പരമ്പര നേട്ടം ഇന്ത്യക്ക് പ്രയാസമാണ്. അഭിഷേക് ശർമ, സഞ്ജു സാംസൺ എന്നിവർ നൽകുന്ന മികച്ച തുടക്കം വളരെ പ്രധാനപ്പെട്ടതാണ്. ക്യാപ്റ്റൻ സൂര്യകുമാർ യാദവിന്റെ മോശം ഫോം ഇന്ത്യയെ പിന്നോട്ടടിക്കുന്ന കാര്യങ്ങളിലൊന്നാണെന്ന് തന്നെ പറയാം.