ശബരിമല വിശേഷം

സന്നിധാനം: ശബരിമല സന്നിധാനത്ത് ആൾക്കൂട്ട നിയന്ത്രണത്തിന് പോലീസിനൊപ്പം ആർഎഎഫും. മണ്ഡലകല മഹോത്സവത്തിന് നട തുറന്നത് മുതൽ സംസ്ഥാന പോലീസ് സേനയോടൊപ്പം ആൾക്കൂട്ട നിയന്ത്രണ നടപടികൾ കാര്യക്ഷമമായി നടപ്പാക്കാൻ റാപിഡ് ആക്ഷൻ ഫോഴ്‌സിൻ്റെ 140 പേരുടെ ബറ്റാലിയനും സന്നിധാനത്തുണ്ട്. ഡെപ്യൂട്ടി കമാൻഡൻ്റ് ബിജു റാമിൻ്റെ നേതൃത്വത്തിലുള്ള ബറ്റാലിയനിൽ ദ്രുത പ്രതികരണ സംഘത്തിലെ 30 പേരുമുണ്ട്.

മരക്കൂട്ടം, നടപ്പന്തൽ, തിരുമുറ്റം, ഡിഫെൻസ് മോർച്ച, സന്നിധാനം, ഭസ്മകളം, അരവണ വിതരണ കേന്ദ്രം എന്നിവയാണ് ആർഎഎഫിൻ്റെ പ്രധാന ഡ്യൂട്ടി പോയിൻ്റുകൾ. മകരവിളക്കിന് നടതുറന്ന ഡിസംബർ 30, 31 തീയതികളിൽ തിരക്ക് വളരെ കൂടുതലായിരുന്നുവെങ്കിലും പിന്നീട് നിയന്ത്രണവിധേയമായെന്നും ജനുവരി 14നു നടക്കുന്ന മകരവിളക്ക് പ്രമാണിച്ചു കൂടുതൽ സേനാഗങ്ങളെ നിയോഗിക്കുമെന്നും ഡെപ്യൂട്ടി കമാൻഡന്റ് ബിജു റാം അറിയിച്ചു.

സന്നിധാനത്ത് അയ്യപ്പന്മാർക്ക് സൗജന്യ ഫിസിയോതെറാപ്പിയുമായി ആരോഗ്യ പ്രവർത്തകർ

മലകയറിയെത്തുന്ന അയ്യപ്പന്മാർക്ക് അനുഭവപ്പെടുന്ന പേശീവലിവ്, സന്ധി പ്രശ്നങ്ങൾ തുടങ്ങിയവ പരിഹരിക്കാൻ സൗജന്യ ഫിസിയോതെറാപ്പിയുമായി ആരോഗ്യ പ്രവർത്തകർ സന്നിധാനത്ത്. പത്തനംതിട്ടയിലെ റീഹാബിലിറ്റേഷൻ-പാലിയേറ്റീവ് കെയർ സെൻ്ററും ഇന്ത്യൻ അസോസിയേഷൻ ഓഫ് ഫിസിയോതെറാപിസ്റ്റ് എന്നിവർ ചേർന്ന് നടത്തുന്ന സന്നിധാനത്തെ ഫിസിയോതെറാപ്പി കേന്ദ്രം കഴിഞ്ഞ അഞ്ചു വർഷമായി സന്നിധാനത്ത് പ്രവർത്തിക്കുന്നുണ്ട്.

സംസ്ഥാനത്തെ പലയിടങ്ങളിൽ നിന്നുള്ള ഫിസിയോ തെറാപിസ്റ്റുകൾ സൗജന്യ സേവനമാണ് ഈ കേന്ദ്രത്തിൽ നൽകുന്നത്. ദേശീയ ആരോഗ്യ മിഷനിൽ നിന്നുള്ള ആരോഗ്യ പ്രവർത്തകരും ഇവിടെയുണ്ട്. മണ്ഡലകാലത്ത് അറുപത്തിഅയ്യായിരത്തോളം പേർക്കും മകരവിളക്കിന് നടതുറന്ന് ഇതുവരെ മുന്നൂറോളം അയ്യപ്പ ഭക്തർക്കും ചികിത്സ നൽകിയതായി ഫിസിയോതെറാപിസ്റ്റും കേന്ദ്രത്തിൻ്റെ ഇൻ ചാർജുമായ എസ് നിഷാദ് പറഞ്ഞു.

സന്നിധാനത്തെത്തുന്ന പല അയ്യപ്പ ഭക്തർക്കും കായിക താരങ്ങളിൽ കാണപ്പെടുന്ന പേശി വലിവ്, സ്പ്രൈൻ, മസിൽ ടാപ്പിങ് എന്നീ പ്രശ്നങ്ങളാണ് കണ്ടുവരുന്നത്. ഇവ മരുന്നില്ലാതെ തന്നെ പ്രത്യേക സ്ട്രെച്ചിങ്ങിലൂടെ പെട്ടന്ന് സുഖപ്പെടുത്താനാകും. സന്നദ്ധ പ്രവർത്തനത്തിനു താല്പര്യമുള്ള ആരോഗ്യ പ്രവർത്തകരുടെ ലിസ്റ്റ് മുൻകൂട്ടി തയ്യാറാക്കി ആരോഗ്യ വകുപ്പിൻ്റെ അനുമതിയോടെയാണ് സന്നിധാനത്തെ ഫിസിയോതെറാപി കേന്ദ്രത്തിൽ നിയോഗിക്കുന്നതെന്നു നിഷാദ് കൂട്ടിച്ചേർത്തു. ഫിസിയോതെറാപ്പി കേന്ദ്രത്തിൻ്റെ പ്രവർത്തന സമയം രാവിലെ 8:30 മുതൽ വൈകിട്ട് 5:30 വരെയാണ്.