കൊച്ചി വാട്ടർ മെട്രോ

കൊച്ചി: ക്രിസ്മസ് - പുതുവത്സരാഘോഷ ദിവസങ്ങളിൽ കൊച്ചി വാട്ടർ മെട്രോയ്ക്ക് റെക്കോഡ് നേട്ടം. പ്രതിദിന യാത്രക്കാരുടെ എണ്ണം പുതിയ റെക്കോഡിലെത്തി. ഇക്കഴിഞ്ഞ ഞായറാഴ്ചത്തെ (ഡിസംബർ 28) കണക്കാണ് മുൻ റെക്കോഡിനെ മറികടന്നത്. ഞായറാഴ്ച 17,058 പേർ യാത്ര ചെയ്തു. നേരത്തെ 15,222 ആയിരുന്നു ഏറ്റവും ഉയർന്ന പ്രതിദിന യാത്രക്കാരുടെ എണ്ണം. കഴിഞ്ഞ വർഷം ഡിസംബർ 29നായിരുന്നു ഈ റെക്കോഡ്. കൊച്ചി നഗരവും പ്രാന്തപ്രദേശങ്ങളും വൻ ആഘോഷത്തിലമർന്ന പുതുവർഷത്തലേന്ന് പ്രതിദിന യാത്രക്കാരുടെ എണ്ണം ഇനിയും ഉയർന്നേക്കുമെന്ന് വാട്ടർ മെട്രോ അധികൃതർ പ്രതീക്ഷിക്കുന്നുണ്ട്.

ക്രിസ്മസ് - പുതുവത്സരാഘോഷ ദിവസങ്ങളിൽ ഹൈക്കോടതി - ഫോർട്ട് കൊച്ചി റൂട്ടിലാണ് ഏറ്റവുമധികം തിരക്ക് അനുഭവപ്പെട്ടത്. ഇക്കാലയളവിൽ പ്രതിദിന ശരാശരി യാത്രക്കാരുടെ എണ്ണം 7000ത്തിൽനിന്ന് 10,000 ആയി ഉയർന്നു. ഞായറാഴ്ച 216 ട്രിപ്പുകളാണ് നടത്തിയതെന്ന് കൊച്ചി വാട്ടർ മെട്രോ ലിമിറ്റഡ് ചീഫ് ഓപ്പറേറ്റിങ് ഓഫീസർ സാജൻ പി ജോൺ ടൈംസ് ഓഫ് ഇന്ത്യയോട് പ്രതികരിച്ചു. ശനിയാഴ്ച 15,550 പേരും തിങ്കളാഴ്ച 13,561 പേരും യാത്ര ചെയ്തുവെന്നും അദ്ദേഹം അറിയിച്ചു.

അതേസമയം ക്രിസ്മസ് തലേന്ന് മുതൽ വാട്ടർ മെട്രോയിലെ പ്രതിദിന യാത്രക്കാരുടെ എണ്ണം 10000ത്തിന് മുകളിലാണ്. ഡിസംബർ 24ന് 10,052 ഉം ഡിസംബർ 25ന് 13,556 ഉം ഡിസംബർ 26ന് 13,745 ഉം ആണ് പ്രതിദിന യാത്രക്കാരുടെ എണ്ണം. കൊച്ചി മെട്രോ സർവീസ് ആരംഭിച്ച 2023 ഏപ്രിൽ 25 മുതൽ ഇതുവരെ 57,34,439 പേരാണ് വാട്ടർ മെട്രോയിലൂടെ കൊച്ചിയുടെ ഓളപ്പരപ്പ് ആസ്വദിച്ചത്. അതിനിടെ, ടിക്കറ്റിലൂടെ ഉള്ള വരുമാനം വർധിപ്പിക്കാനുള്ള ശ്രമം തുടരുന്നതിനിടെ വാട്ടർ മെട്രോ ടെർമിനലുകളിലെ കൊമേഴ്സ്യൽ സ്പേസുകൾ വാടകയ്ക്ക് നൽകി ടിക്കറ്റിതര വരുമാനം കണ്ടെത്താനുള്ള നടപടികളും മറുവശത്ത് പുരോഗമിക്കുന്നുണ്ട്.

റെക്കോഡ് യാത്രക്കാരുമായി കൊച്ചി മെട്രോയും

ക്രിസ്മസ് - പുതുവത്സരാഘോഷ ദിവസങ്ങളിൽ കൊച്ചി മെട്രോയിലും യാത്രക്കാരുടെ എണ്ണം വർധിച്ചു. ഇക്കഴിഞ്ഞ ചൊവ്വാഴ്ച (ഡിസംബർ 30) ആണ് ഈ മാസത്തെ ഏറ്റവും ഉയർന്ന യാത്രക്കാരുടെ എണ്ണം. ചൊവ്വാഴ്ച 1,24,637 പേരാണ് മെട്രോയിൽ യാത്ര ചെയ്തത്. പുതുവർഷ ദിവസവും തലേന്നുമായി റെക്കോഡ് യാത്രക്കാരെ ആണ് കൊച്ചി മെട്രോ പ്രതീക്ഷിക്കുന്നത്. 2024ലെ കൊച്ചി മെട്രോയുടെ ഏറ്റവും ഉയർന്ന പ്രതിദിന യാത്രക്കാരുടെ എണ്ണം 1,46,355 ആണ്. ഒക്ടോബർ 25നായിരുന്നു ഈ നേട്ടം. 2025ലെ ഏറ്റവും ഉയർന്ന പ്രതിദിന യാത്രക്കാരുടെ എണ്ണം ഓഗസ്റ്റ് 14ലെ 1,36,814 ആണ്.