പുതുവത്സരാഘോഷം

കോഴിക്കോട്: പുതുവത്സരാഘോഷങ്ങൾ ആരംഭിക്കാനിരിക്കെ നിരീക്ഷണം ശക്തമാക്കി പോലീസ്. ജില്ലകൾ കേന്ദ്രീകരിച്ചാണ് വാഹന പരിശോധന ഉൾപ്പെടെ നടത്തുന്നത്. കോഴിക്കോട് ബീച്ചിൽ കോതിപ്പാലം മുതൽ ഭട്ട് റോഡ് വരെയുള്ള ഭാഗങ്ങളിൽ നിരീക്ഷണം ശക്തമാക്കി. ഓപ്പൺസ്റ്റേജിനും ചുറ്റുവട്ടത്തുമായി പരിപാടികൾ സംഘടിപ്പിക്കുമ്പോൾ ഏകദേശം 40,000 പേരെങ്കിലും എത്താറുണ്ടെന്നാണ് പോലീസിൻ്റെ അനുമാനം.

പുതുവത്സരവേളയിലും അവധിക്കാലത്തുള്ള ആഘോഷവേളകളിലുമായി ഒരുലക്ഷം പേരെങ്കിലും കോഴിക്കോട് കടപ്പുറത്ത് എത്താറുണ്ട്. 200 ൽപ്പരം പോലീസുകാരെ ബീച്ചിൽ മാത്രമായി വിന്യസിക്കും. മഫ്തിയിലും പോലീസ് സാന്നിധ്യമുണ്ടാകുമെന്ന് പോലീസ് ടൗൺ അസിസ്റ്റൻ്റ് കമ്മിഷണർ ടികെ അഷ്റഫ് പറഞ്ഞു.പുതുവത്സരാഘോഷത്തോടനുബന്ധിച്ച് ജില്ലയിൽ എക്‌സൈസും പോലീസും സംയുക്ത പരിശോധന ശക്തമാക്കും. മയക്കുമരുന്നുകളുടെ ഉപയോഗം, അനധികൃത മദ്യവിൽപ്പന തുടങ്ങിയവ നടക്കുന്നില്ലെന്ന് ഉറപ്പുവരുത്തും. ഇത്തരം കേസുകളിൽ ഉൾപ്പെട്ടവരുടെ പട്ടിക പോലീസും എക്‌സൈസും പരസ്പരം കൈമാറും.

ഇതരസംസ്ഥാന ബസുകൾ, മറ്റു യാത്രാവാഹനങ്ങൾ എന്നിവ പരിശോധിക്കും. മുൻകാല അബ്കാരി, എൻഡിപിഎസ് കേസിലുൾപ്പെട്ടവരെ നിരീക്ഷിക്കും. താലൂക്ക് തലത്തിൽ സ്ട്രൈക്കിങ് ഫോഴ്‌സുകൾ, ജില്ലാതലത്തിൽ കൺട്രോൾ റൂം, ഹൈവേകളിലെ വാഹനപരിശോധനയ്ക്ക് പ്രത്യേക ഹൈവേ പട്രോൾ ടീം എന്നിവയുമുണ്ടാകും. പോലീസ്, ഫോറസ്റ്റ്, റവന്യൂ വകുപ്പുകളുമായി ചേർന്ന് സംയുക്ത പരിശോധനയ്ക്കും തീരുമാനിച്ചു.

ബാർ ഹോട്ടലുകൾ, റസ്റ്ററൻ്റുകൾ, റിസോർട്ടുകൾ മറ്റ് അനുബന്ധ സ്ഥാപനങ്ങൾ എന്നിവിടങ്ങളിൽ ഡിജെ പാർട്ടികളും അനുബന്ധ ആഘോഷങ്ങളും നടത്തുമ്പോൾ പങ്കെടുക്കുന്നവരുടെ വിലാസവും ഫോൺനമ്പറും വ്യക്തമാക്കണം. സ്ഥാപനം നേരിട്ട് നടത്തുന്നതല്ലെങ്കിൽ ആരാണ് സംഘടിപ്പിക്കുന്നതെന്ന വിവരവും എക്‌സൈസ്, പോലീസ് എന്നിവരെ മുൻകൂട്ടി അറിയിക്കണം.

പുതുവത്സരാഘോഷങ്ങളിലും അനുബന്ധ ആഘോഷ പരിപാടികളിലും മദ്യം ഉപയോഗിക്കുന്നുണ്ടെങ്കിൽ പ്രത്യേകം ലൈസൻസ് (എഫ്എൽ 6) എടുക്കണം. 21 വയസ്സിന് മുകളിലുള്ളവർക്കാണ് മദ്യം നൽകുന്നതെന്ന് ഉറപ്പുവരുത്തണം. ഇത്തരം പാർട്ടികൾ സംബന്ധിച്ച പരസ്യങ്ങളിൽ നിയമവിരുദ്ധ കാര്യങ്ങൾ ഉൾപ്പെടുത്തരുത്. സിസി ടിവി നിരീക്ഷണം ഉറപ്പുവരുത്തുകയും ആവശ്യപ്പെട്ടാൽ കൈമാറുകയും വേണം.

മദ്യം, മയക്കുമരുന്ന് എന്നിവ സംബന്ധിച്ച വിവരങ്ങൾ കൈമാറാം

ജില്ലാ കൺട്രോൾ റൂം - 0495 2372927, അസി. എക്‌സൈസ് കമ്മിഷണർ (എൻഫോഴ്സ്മെന്റ്), കോഴിക്കോട് - 9496002871, എക്‌സൈസ് സർക്കിൾ ഇൻസ്‌പെക്ടർ, എക്സൈസ് എൻഫോഴ്‌സ്മെന്റ് ആൻഡ് നർക്കോട്ടിക് സ്‌പെഷ്യൽ സ്‌ക്വാഡ് കോഴിക്കോട് - 9400069675, എക്‌സൈസ് സർക്കിൾ ഇൻസ്‌പെക്ടർ കോഴിക്കോട് - 9400069677